غرام المغرور الفصل التاسع نسمة مالك

البارت التاسع
غرام المغرور
عتاب!!
خديجه.
تقف خلف فارس الجالس يتابع إسراء باهتمام عبر الكاميرا الموجودة بغرفتها، والموصلة بشاشة داخل جناحه الخاص.
عقدت يديها أمام صدرها، وتحدثت بنفاذ صبر قائلة
وبعدين معاك يا فارس!!.. أنا أول مرة أشوفك مهتم بواحدة بالشكل دا، حتى بعد اللي قالته عنك دلوقتي؟!
قالت إيه يا ديجا؟.. أنا كان معايا تليفون شغل، ومسمعتش حوارك معاها.
قالها فارس وعيناه لم تتزحزحا عن إسراء.
جلست خديجه بجواره، وربتت على كتفه برفق مردفة
أنا برضوا قولت إنك أكيد مسمعتش، وإلا كان زمانك عامل مصيبة إحنا في غنى عنها.
ابتسم فارس بسخرية وهو يقول
هي للدرجاتي غلطت فيا ولا إيه؟!
أجابته خديجه بتعقل
البنت شكلها تعبان أوي وقلبها مجروح جرح مش هين، وأكيد كلامها مش قصداه ولا فاهمة معناه، وانت لازم تفكر كويس جدًا في حكاية جوازك منها دي.. لأنها للأسف بحالتها دي، واللي قالته، صعب توافق عليك أو على غيرك حتى.. فبلاش تحرج نفسك معاها يا حبيبي.
هب واقفًا، وسار نحو الشاشة ببطء، ثم عدّل زاوية الكاميرا حتى ظهر وجه إسراء بوضوح.
ظل صامتًا للحظات، ثم قال
أنا نفسي مستغرب اللي حصلي من ساعة ما شوفتها يا ديجا.. هي فعلًا مختلفة عن أي حد قابلته قبل كده، وطريقتها وشخصيتها مش شبه الناس اللي اتعاملت معاهم.
أخذ نفسًا عميقًا، وتابع بأسف
كل الستات اللي اترموا في طريقي معظمهم كان عنده مصلحة.. اللي طمعانة في فلوس، واللي شغالة لحساب أعدائي، وبنت رئيس الوزراء دي خطوبتنا مجرد بسنس وبس.
طرد زفرة ضيق وأكمل
ومش هكون مثالي وأقولك إني مكنتش جزء من الدنيا دي.. بس خلاص.. العمر بيجري وأنا بقيت عندي 33 سنة ولسه مجبتش وريث لأملاك الدمنهوري، وإسراء ظهرتلي في وقت أنا محتاج فيه حد يرجعني أفكر صح، ويخليني أبعد عن قرارات كتير غلط بعملها.
رفعت خديجه حاجبيها بدهشة، ورمقته بنظرات منذهلة وهي تقول
وتفتكر إسراء هي الإنسانة دي يا ابني؟!
ابتسم فارس ابتسامة هادئة، وحرك رأسه بالإيجاب عدة مرات وهو يقول
هي يا ديجا.. قدرت تعمل اللي قبلها فشلوا فيه.
صمت للحظة، ثم تابع
من أول ما قابلتها وأنا حاسس إن وجودها هيغير حاجات كتير في حياتي.
حركت خديجه رأسها بالنفي واقتربت منه، ووضعت كف يدها على جبهته وتحدثت بشك
لا لا لا.. أنت مش طبيعي أبدًا.. فارس الدمنهوري طول عمره مالوش في الكلام العاطفي ولا الاهتمام المبالغ فيه.. أكيد في حاجة غلط.
رفع فارس إحدى حاجبيه ونظر لها بفخر قائلًا
دا أنا اتغيرت فعلًا يا ديجا.. وإسراء قدرت تلفت نظري بطريقة محدش قدر يعملها قبل كده.
دمدمت خديجه بصوت هامس محدثة نفسها
اممم ربنا يستر.. شكلنا داخلين على حكاية كبيرة، وعلى الله محدش يتأذى.
بينما عاد فارس يتابع إسراء باهتمام، واختفت ابتسامته شيئًا فشيئًا حين استمع لحديثها الباكي الذي يدل على شدة حزنها وألمها.
...................................
بغرفة إسراء..
كانت إلهام يعتصر قلبها ألمًا على بكاء وحيدتها.. ليس بيدها أي شيء تقدمه سوى الدعاء لها واحتوائها إلى صدرها والبكاء معها.
تلك الفتاة الصغيرة التي أصبحت بين ليلة وضحاها أرملة ومسؤولة عن ابنتها ووالدتها أيضًا.. دفنت حزنها بين ثنايا روحها، وجاهدت حتى تظهر قوية بعدما رأت نظرات بعض الناس لها، نظرات قاسية زادت من ألمها.
وبالأخير وقعت تحت رحمة فارس، ذلك المغرور كما تطلق عليه هي.
بنظرها الحياة ليست عادلة، ولكنها على يقين أن الله الذي خلق هذه الحياة سيكون عادلًا ورحيمًا بها.
أطبقت جفنيها ببطء حين داهمتها ذكرى زوجها الراحل.. الرجل الذي كان سندًا لها، ورغم ضيق الحال والظروف الصعبة التي مرت عليهما أثناء فترة زواجهما القصيرة، إلا أنه كان بجوارها وقت ضعفها.
ظلًا تستند إليه في الهموم والأحزان، ومصدر أمان لها.
لينتهي كل هذا وتصبح وحيدة من دونه بعدما حُرمت منه للأبد.
بكت إسراء داخل عناق والدتها، تتمسك بها بكل قوتها مرددة بغصة مريرة
أنا مش حمل كل اللي بيحصلي دا يا ماما.. جوزي حب عمري يموت في عز شبابه ويسبني لوحدي في الدنيا القاسية دي.. أنا من غيره بقي ضهري مكسور.
رفعت وجهها ونظرت لها بعينين شديدتي الاحمرار، وتابعت بصعوبة من بين شهقاتها
من يوم ما مات وأنا بلف حوالين نفسي في دايرة مقفولة مش عارفة أخرج منها، وقولت أعمل محاولة وأروح لصاحب الشركة يمكن ربنا يجعله سبب وأقدر أصرف معاش رامي.
ازداد نشيجها وأكملت بأسف
بس طلع معندوش قلب وخلى الحرس بتوعه يضربوا عليا نار.. أنا كدبت عليكي.. هو مكنش ذوق ولا نيلة معايا يا ماما.
شهقت إلهام بصدمة مرددة
يا كبدي يا بنتي.
مسحت إسراء عبراتها بظهر يدها، وتابعت بغيظ
ودلوقتي جابني البيت عنده هنا علشان يعرف مني اللي جوزي شافه عنده في الشركة وقالي عليه قبل ما يموت.
عقدت إلهام حاجبيها، ونظرت لها بقلق وتحدثت بتساؤل
وهو عرف منين إن جوزك قالك حاجة عن شغله يا إسراء؟!
زمت إسراء شفتيها وأجابتها بملامح عابسة
أنا اللي قولتله قدام الحرامي اللي بيسرقه واللي عامل نصايب في شركته من ورا ضهره، علشان أحرق دمه زي ما سيح دمي وخت 6 غرز مش عايزين يخفوا لحد دلوقتي.
يالهوي على هبلك يا بت.. بقى علشان تحرقي دمه توقعي نفسك مع واحد حرامي ممكن ينتقم منك ويعمل فيكي حاجة يا إسراء؟!
أردفت بها إلهام بعتاب وهي تخبط على صدرها بخوف.
عضت إسراء على شفتيها، وبإحراج قالت
أنا عارفة إني اتغبيت وقتها، وغضبي وغيظي عماني ومبقتش عارفة بقول إيه.. بس دا ميدلوش الحق إنه يبقى مراقبني في كل خطوة بعدها لحد ما استغل تعبي وجابني على بيته.
وضعت إلهام أصابعها أسفل ذقنها تفكر بحديث ابنتها بتمعن، وتحدثت قائلة
يبقى أنا نظرتي في فارس دا صح.. الراجل فعلًا طلع عايز يحميكي بعد كلامك اللي قولتيه قدام الحرامي.
صكت إسراء على أسنانها بغيظ متمتمة
يا سلام يا ست لوما، وهو